Home / உலகம் / அவுஸ்ரேலியா /

போலி மருத்துவர்: அவுஸ்திரேலியாவில் ஆள்மாறாட்டம் செய்த நபருக்கு அபராதம்

Posted On : April 4, 2017

நண்பரின் சான்றிதழ்கள் மற்றும் ஆவணங்களை திருடி அவுஸ்திரேலியாவில் மருத்துவராக நடித்து ஆள்மாறாட்டம் செய்த இந்திய வம்சாவளி நபருக்கு 30 ஆயிரம் டொலர் அபராதம் விதிக்கப்பட்டுள்ளது.

அவுஸ்திரேலியாவின் நியூ சவுத் வேல்ஸ் நகரில் உள்ள அரசு மருத்துவமனையில் முட நீக்கியல் துறை நிபுணராக பணியாற்ற இந்தியாவை சேர்ந்த ஷியாம் ஆச்சாரியா என்பவர் கடந்த 2003 ஆம் ஆண்டு அந்நாட்டுக்கு சென்றுள்ளார்.

2003 ஆம் ஆண்டிலிருந்து 2014 வரை சுமார் 11 ஆண்டு காலம் குறித்த மருத்துவமனையிலும் அவுஸ்திரேலியாவில் உள்ள மூன்று இதர மருத்துவமனைகளில் உதவி மருத்துவராக பணியாற்றிய ஆச்சாரியா, அந்நாட்டின் குடியுரிமையை பெற்றதுடன், அவுஸ்திரேலியாவில் வீடு ஒன்றையும் வாங்கியுள்ளார்.

அவுஸ்திரேலிய நாட்டு குடிமகன் என்ற வகையில் அந்நாட்டு கடவுச்சீட்டு ஒன்றையும் பெற்று வெற்றிகரமாக தொழில் நடத்தி வந்துள்ளார் ஆச்சாரியா.

இந்நிலையில், பிரித்தானியாவில் உள்ள மான்செஸ்டர் நகரின் அருகே அமைந்துள்ள பிரபல மருத்துவமனையில் பணியாற்றி வரும் மருத்துவரான சாரங் சிட்டாலே என்பவருக்கு சில நண்பர்கள் மூலமாக ஒரு தகவல் கிடைத்துள்ளது.

அதில், தனது பெயரால் போலி ஆவணங்களை தயாரித்து அவுஸ்திரேலியாவில் ஷியாம் ஆச்சாரியா என்பவர் ஆள்மாறாட்டம் மற்றும் மோசடியில் ஈடுபட்டு வருவதாக அறிந்த அவர் இதுதொடர்பாக அவுஸ்திரேலிய காவல்துறையிடம் புகார் அளித்துள்ளார்.

1999-2000 ஆண்டுகளுக்கிடையில் தானும் ஆச்சாரியாவும் ஒன்றாக வசித்தபோது தனது சான்றிதழ்களையும், சில முக்கிய ஆவணங்களையும் திருடிய ஆச்சாரியா, அதை வைத்து ஆள்மாறாட்டம் செய்து வருவதாக மருத்துவரான சாரங் சிட்டாலே தனது புகாரில் குறிப்பிட்டிருந்தார்.

இந்த புகார் மீது விசாரணை நடத்திய பொலிசார் ஆச்சாரியாவை கைது செய்து சிட்னி டவுனிங் சென்டர் நீதிமன்றத்தில் வழக்கு தொடர்ந்தனர்.

இந்த வழக்கில் நேற்று தீர்ப்பளித்த நீதிபதி ஜெனிபர் அட்கின்சன், ஆச்சாரியா செய்துள்ள மோசடி, மிகவும் மோசமான குற்றச்செயலாக உள்ளதால் 30 ஆயிரம் டொலர்களை அபராதமாக விதித்து தீர்ப்பளித்தார்.

மேலும், எதிர்தரப்பு வாதியான சிட்டாலேவின் வழக்கு செலவினங்களுக்கு என்று தனியாக 22 ஆயிரம் டொலர்களை வழங்குமாறும் நீதிபதி உத்தரவிட்டுள்ளார்.

Comments

தொடர்புடைய செய்திகள்